monumenta.ch > Augustinus > bkeCod.16.97v > sectio 10 > csg42.132 > 34 > bsbClm6224.412 > sectio 3 > sectio > Psalmi, 68 > sectio 24 > bkeCod.20.101v > sectio 19 > sectio 1 > sectio 3 > bnf10439.13 r > sectio 6 > sectio 4 > bnf11947.61 v > ad Corinthios II, 11 > bsbClm6343.34 > bsbClm6224.431 > 433 > sectio 26 > sectio 21 > uwbM.p.th.f.68.289 > sectio 3 > sectio 29 > bsbClm6224.47 > sectio 1 > sectio 15 > csg75.470 > Ioannes, 1 > sectio 23 > sectio 11 > csg75.54 > csg51.252 > bsbClm6224.34 > sectio 18 > csg457.52 > Matthaeus, 27 > uwbM.p.th.f.68.233 > csg458.122 > sectio 20 > sectio 30 > sectio 26 > sectio > sectio 10

Word Selection for Searching

Report an Error in this Sectio
Gregorius Magnus, Homiliae in Evangelia, 2, 34, 10
Virtutes etenim vocantur illi nimirum spiritus, per quos signa et miracula frequentius fiunt. Potestates etiam vocantur hi qui hoc potentius caeteris in suo ordine perceperunt, ut eorum ditioni virtutes adversae subiectae sint, quorum potestate refrenantur, ne corda hominum tantum tentare praevaleant quantum volunt. Principatus etiam vocantur qui ipsis quoque bonis angelorum spiritibus praesunt, qui subiectis aliis dum quaeque sunt agenda disponunt, eis ad explenda divina ministeria principantur. Dominationes autem vocantur qui etiam potestates principatum dissimilitudine alta transcendunt. Nam principari est inter reliquos priorem existere, dominari vero est etiam subiectos quosque possidere. Ea ergo angelorum agmina, quae mira potentia praeeminent, pro eo quod eis caetera ad obediendum subiecta sunt, dominationes vocantur. Throni quoque illa agmina sunt vocata, quibus ad exercendum iudicium semper Deus omnipotens praesidet. Quia enim thronos Latino eloquio sedes dicimus, throni Dei dicti sunt hi qui tanta divinitatis gratia replentur, ut in eis Dominus sedeat, et per eos sua iudicia decernat. Unde et per Psalmistam dicitur: Sedes super thronum, qui iudicas aequitatem . Cherubim quoque plenitudo scientiae dicitur. Et sublimiora illa agmina idcirco cherubim vocata sunt, quia tanto perfectiori scientia plena sunt, quanto claritatem Dei vicinius contemplantur; ut, secundum creaturae modum, eo plene omnia sciant, quo visione conditoris sui per meritum dignitatis appropinquant. Seraphim etiam vocantur illa spirituum sanctorum agmina quae ex singulari propinquitate conditoris sui incomparabili ardent amore. Seraphim namque ardentes vel incendentes vocantur. Quae, quia ita Deo coniuncta sunt ut inter haec et Deum nulli alii spiritus intersint, tanto magis ardent, quanto hunc vicinius vident. Quorum profecto flamma amor est, quia quo subtilius claritatem divinitatis eius aspiciunt, eo validius in eius amore flammescunt.